O encontro de onte foi xeneroso, verdadeiro. Os organizadores do acto, Alberto e Xurxo exerceron de anfitrións magníficos. Un pracer compartir a palabra e a mesa con persoas que cren na poesía ata as últimas consecuencias.
Foi íntimo, algo máis dunha trintena de persoas estaban alí para escoitarnos. Interviu primeiro Xosé Abeal, recuperando a patria da infancia, os estertores da vida. Seguín eu, ofrecida ao pouso, coma poucas veces. Despois Emma Pedreira, estreando libro, Xoguetes póstumos (que levou o premio de poesía erótica Illas Sisargas con belos collages de Ana Cibeira), os seus ósos, a casa e o faro ofrenda última para corpos. Finalmente Miguel Anxo Fernán-Vello, poeta ao servizo da beleza. Os instantes máis transparentes da súa man.
E por se isto fora pouco, Teresa Seara agasallándonos sempre memoriais das poéticas, xenerosa e necesaria como só nós sabemos.
Sublime foi a intervención de Ariel Ninas, creando extraordinarios espazos musicais coa zanfona, un instrumento descoñecido, intrigante, de posibilidades infindas, como demostrou o seu executor. Improvisacións cómplices con cada unha das intervencións. Todo un descubrimento que desexo seguir desfrutando, intercambio de Borsalinos incluido.
A todas e todos agradecida por entregarse sen reservas, convertindo a tarde no mellor acubillo.
Moitas veces.
Estou encantada (de encantar na súa terceira acepción no diccionario da RAG) co convite da asociación Cultural e Social RR.LL para participar neste recital de mañá, xoves, á noite (Fundación Caixa Galicia, Médico Rodríguez 2-4, 20:OO). Deixovos aquí o convite. Vai ser un pracer compartir palabras con todas e todos vos. Os poetas: Xosé Abeal, Miguel Anxo Fernán-Vello, Emma Pedreira e eu mesma. Ademáis contaremos coa música de Ariel Ninas. Teresa Seara presentará o acto.
Onte achegueime ao Ciclo Poetas di(n)versos, organizado pola Concellería de Cultura e dirixido por Yolanda Castaño. Estreaban Lucía Aldao e Eduardo Aute.
O acto estivo realmente ben. Lucía Aldao magnífica, magnífica. Un verdadeiro pracer escoitala. Eu xa a vira recitar noutras dúas ocasións. Coñecina hai moitos anos, moitos, na facultade de filoloxía. Xa daquela se convertiu para min nunha poeta de referencia. Lucía Aldao, precisión de cirurxán na forxa do verso.
Despois Aute leu os seus poemigas. Foi raro, eu sempre fun escoitalo a concertos. Estivo ben, penso no enxeño dalgúns textos. Aute foi honesto, explicou antes de comezar como concebía el estos poemigas, iso gustoume. Si no tienes sueños, corres el peligro de teñer dueños.
Parabéns sentidos aos organizadores e promotores desta iniciativa. Onte quedou ben demostrado que hai un público ávido de poesía. Tódolos meses, cara a mediados, un encontro con dous grandes poetas. O vindeiro 15 de decembro, Luz Pozo e Luis García Montero.
Acabo de chegar dun magnífico encontro co gravador José Valentín e Luz Pozo, poeta á que o Concello de Culleredo lle rendía homenaxe.
Nunha das salas de Vila Melania tiven a oportunidade de escoitar novas anécdotas encantadoras da nena Luz, xa poeta, fascinada cunha ilusitración de xemas de cores; ou disposta a aceptar con cinco anos a un veciño de seis como noivo, só a cambio dunha caixiña de ceras “capaces de fermosealo todo”.
Luz falou tamén de música, de inspiración, de Vicente Aleixandre, da poesía, do espírito e da alma, da imprenta que lle agasallaran os reis de pequena, da flor que detén o tempo.
Pola súa banda José Valentín ofreceu, coma sempre, esas palabras sabias e agradecidas que conmoven polo verdadeiras.
Aquí estou, ofrecida a estes dous mestres.
Mañá mercores 30 ás 20:00 terá lugar na Biblioteca dos Rosales (na Praza Elíptica) o espectáculo poético-musical Soños e poemas de Cirlot, a cargo do grupo Ouriol integrado pola poeta Eva Veiga e os músicos Bernardo Martínez (clarinete e percusión) e Fito Ares ( frauta traveseira e saxos).
Experimentei este espectáculo en xullo, transparencia na voz, intensidade de frauta, percusión que atravesa.
Algo con ás de paxaro, que entre os beizos e a voz vai morrendo.
Cirlot
O martes 8 á tardiña (20:30) celebraremos a palabra do poeta Manuel María no Teatro Rosalía de Castro. No acto, organizado pola Concellería de Cultura e a Fundación Manuel María, ademáis da lectura dos seus poemas na voz de Santiago Fernández e na miña propia, estrearase a obra “Aventuras e desventuras dunha espiña de toxo chamada Berenguela”. Esta obra dramática, musicada por Nani García será interpretada pola actriz María Inés Cuadrado e o cuarteto de clarinetes “Xerión”.
Alí estaremos, baixo a amendoeira en flor, entre sementes de paxaros e verdades de outeiro.
O idioma somos nós, povo común,
vencello que nos xungue e ten en pé,
herencia secular de cada un,
fogar no que arde acesa a nosa fe.
Manuel María
O vindeiro xoves, ás 20:00 preséntase en Moret Art Espacio (Olmos 12-14) o nº 9 de El invisible anillo. O acto, presentado por Teresa Seara, contará coa participación do director da editorial Eneida, Lur Sotuela.
A seguir terá lugar un recital poético que contará coa participación de Miguel Anxo Fernán Vello, Xulio L. Valcárcel, Emma Pedreira, Lur Sotuela, Eva Veiga e eu mesma.
Resulta que o mestre era un home de carne e óso, unha voz potente, que tiraba polos puños da camisa, coqueto. Con un profundo e explícito respeto polo rito da poesía, o silencio coma o frío, sen aplausos por favor. Ollos fechados.
Os materiais, as traduccións, esa sutil trascendencia das linguas no poema. Español-Inglés-Alemán. Palabras coma lápidas.
Era certa a súa escrita sosegada, as adicatorias luminosas, transparentes. E eu alí, sorbendo as liñas da súa estilográfica, sabéndome afortunada. Feliz.
A Concellaría de Cultura e mulleres de Monte Alto organizan un acto de homenaxe e recoñecemento a todas aquelas mulleres que directa ou indirectamente sufriron as consecuencias da represesión da ditadura franquista.
Música e poesía para honrar a memoria das que nunca tiveron oportunidade de falar e defenderse, para as que foron silenciadas e para as que aínda hoxe son dignas depositarias de feitos moi dolorosos.
A presentación correrá a cargo de Xurxo Souto, e eu síntome honrada de participar xunto con outros poetas neste acto de recoñecimento á memoria.
Xoves 23 ás 12 horas no Campo da Rata. Verémonos alí?
